لا تكتئب
من كتاب "لاتحزن" للدكتور عائض القرنى
الاكتئاب يجتاح العالم !! لا يفرق بين دول غربية وأخرى شرقية! أو غنى وفقير. إنه مرض يصيب الجميع ... ونهايته فى الغالب ... الانتحار!!!
بعض الارقام تؤكد ان ضحاياه وصلوا الى 200 مليون مريض فى كل انحاء العالم .. إلا أن آخر الاحصاءات تؤكد أن واحداً على الاقل بين كل عشرة أفراد على وجه الأض مصاب بهذا المرض الخطير!! الانتحار لا يعترف بالاسماء والمناصب والدول ... لكنه يخاف من المؤمنين.
وقد وصلت خطورة هذا المرض أنه لا يصيب الكبار فقط، بل يصل الى حد مداهمة الجنين فى بطن أمه!!!
هناك الكثير من المشاهير وخاص من يعملون بالفن، يداهمهم هذا المرض، وقد كان الاكتئاب سببا رئيسياً – ان لم يكن الوحيد – فى موت الشاعر صلاح جاهين، وكذلك يقال: ان نابليون بونابرت مات مكتئباً فى منفاه "وتزهق انفسهم وهو كافرون".
..........
اشتريت الكتاب لما حسيت انى عندى اكتئاب، ولو ان تشخيص الاكتئاب مش سهل لانه احساس، وانا كمان مش متخصصة ولا عمرى رحت لدكتور نفسانى للأسف، بس بغض النظر عن التفاصيل اللى ماليش فيها، فانا دايما لما كنت احس انى مكتئبة كنت بشوف فلاشات لصور ومشاهد ومواقف التقتطها واختزنتها دون قصد، ومنها :
من درس تعليم السواقة:
المدربة بتقولى (بصى لأدام دايما، ومتبصيش وراكى غير للمارشدير ولما تكونى عايزة تحددى موقعك ، او تظبطى نفسك و اتجاهك ، وعشان تمشى لادام بشكل اسلم)
من تتر لبرنامج:
جملة على لسان عمرو خالد بيقول (كتر الوقوع بيعلم الوقوف)
مثل انجليزى بيقول:
لا تنشر النشارة، لانها خلاص بقت نشارة.
- فيلم عربى اسمه "ويجا":
احد الابطال بيقول ( اللى عايز يحب حد "حاجة" هيلاقى مليون سبب عشان يحبه، واللى عايز يكره حد – "حاجة" هيلاقى مليون سبب عشان يكرهه)
جملة مش عارفة قريتها فين ولا سمعتها فين:
مضمونها بيقول ( قرب من الناس اللى بتحبك وتسعدك وتساعدك على تحقيق النجاح، لانهم بيحبوك، وابعد عن الناس اللى بتتعبك ومش بتساعدك لانهم مش بيحبوك)
مشهد ف فيلم عربى "عن العشق والهوى":
احد البطلات لما ضاقت بيها الدنيا، جريت تتأمل مشهد الشروق وتخيلت حوار مع الأمل بيكلمها مع سطوع نهار يوم جديد وبيقولها: "اصبرى واتطمنى ، اليوم الحلو ف حياتك لسة مجاش"
درس للشيخ مصطفى حسنى:
سيب نفسك لربنا ، ربنا يديك ...!! ياخد منك .... !! يعزك ...!!! .... يشاء إنه يبتليك ...!!! دى إرادة ربنا لانه اكتر حد عارف مصلحتك لان هو اللى خلقك وشايف اللى انت مش شايفه، فثق فيه وتوكل عليه.
شريط هم الرزق لمحمد حسين يعقوب:
وتزعل ليه؟ لما كل حاجة جاية من عند ربنا، حتى لو انت شايف ان اللى حواليك ناس بتظلمك وقارفينك ف عيشتك، وهو مين اللى خلا الناس دى تعمل كده؟؟ وهو احنا كلنا بنتحرك باذن مين؟؟؟
سواق تاكسى:
الناس بتجرى ورا الدنيا وبتاكل ف بعضها وعايزينها بكل حاجة فيها، مع ان المفروض كلنا نعوز الاخرة، الدنيا دى احنا فيها ضيوف وشوية وماشيين ومحدش واخد حاجة معاه، ربنا اللى بيرزق وربنا اللى بيبتلى، احنا ملناش ف نفسنا حاجة.. جاى رايح منه له، يبقى نزعل ليه ما احنا اصلا كلنا بتوعه وكل حاجة عندنا بتاعة ربنا سبحانه وتعالى ، محدش ليه ف نفسه حاجة.
|
