مش عارفة انا اصلاً عملت مدونة ليه ولا عارفة اكتب فيها ايه، انا لا ادعى الفكر او القدرة الفائقة على الابداع والصياغة الادبية، ولا ازعم ان ليا دواوين شعر مغمورة وعايزاها تطلع لنور، ولا ادعى الثقافة، ولا حتى ليا هوية فكرية مميزة، ده انا حتى مبقراش الجرنال...
والأدهى من كل ده انى حتى معرفش المدونة بتتعمل ازاى، بس اتعاملت معاها معاملة المذكرات اللى كتبتها من سنين فى اجندة زرقا لون بحور الحنين، عترت فيها رميتها ف المهملات وقلت اما صحيح كلام مخبولين!!!
وبما انه ليس ع المخبولين حرج، خلونى افضفض معاكو شوية وبالمرة ارد على سنوهى – صديق مدونتى الوحيد – اللى بيزور مدونتى المسكينة وبيشكر فيها دايماً ووصفها انها من احسن المدونات بالنسبة له مش عارف ازاى – ده انا زرت كام مدونة كده اتعقدت وحسيت انى تافهة وسطحية وماليش اى لازمة – عموما كتر خيرة انه بيرفع من معنوياتى لان دى حاجة بجد انا كنت محتاجاها اوى خصوصا فى الفترة اللى فاتت لانى كنت تعبانة شوية.
وبما ان سنوهى – صديق مدونتى الوحيد – طلب منى اعمل تاج ، وفهمت منه ان معناه انى بسأل نفسى عشر اسئلة وارد عليهم، فانا مقدرش أأخرله طلب، والا مدونتى محدش هيزورها غيرى.
عموما انا هسألنى العشر اسئلة بس ربنا يستر ومرخمش عليا واسئلتى تطلع صعبة او محرجة او حتى شخصية مثلا فتحرجنى او تضايقنى، واتمنى انى اعرف اجاوبهم بصدر رحب عشان مزعلش منى واخسرنى....
س: مشمشمة .. اتكلمى عن نفسك؟؟؟
ج: ولو ان السؤال عام وعايم لكن هحاول اجاوب عليه اجابة واضحة ومباشرة على اد ما اقدر.
انا مشمشة وقعت من شجرة ومحدش سمى عليها، الشجرة ف الصحرا ،والصحرا كانت ضلمة ،والضلمة جوة بير، والبير مالهوش أرار.... بقالى كتير بقع جواه ... الضلمة بتزيد والنفس بيقصر ، الطريق ملهوش نهاية، والسكة من غير اتجاه، يمكن بقع لفوق، ويمكن بطير لتحت، الجاذبية بتطردنى، والهوا بيشدنى، الضمايرمتلخبطة والارقام معكوسة والاوضاع متشقلبة، والاندهاش مقتنع، ماهو اللى ماشى صح بيرجع لورا والاباطرة والحلانجية والفاسقين كيرفهم طالع لفوق.
س: بتعملى ايه مفيد ف حياتك؟
ج: مستسلمة بكل خضوع .. بغوص ف الضلمة وانا سايبة ايديا، رامية نفسى ضحية للبير، سايباه يبلعنى بكل هدوء، بالعب دور البطل التراجيدى اللى نهايتة غالباً بتكون مأسوية لكن بتعلم درس لغيره، يمكن يكون نبيل فنياً فينتحر ويمكن تحرسة العناية الالهية فينتصر.
س: انتى عاقلة والا مجنونة؟
ج: العقل غباء وجنون، والجنون عين العقل، وللاسف انا عاقلة بس مجنونة.
س: نفسك ف ايه؟
ج: نفسى اتخطف ، اخرج م الضلمة، اطلع م البير ، شدونى طلعونى، خدونى للنور، افتحوا عنيا، افتحو الشباك ،عاوزة ابص ... بصصونى ع الدنيا.
كفاية كده يا سنوهى، انا تعبانة، انا لسة ف فترة نقاهة ، ولما اخف خالص هابقى اعملك تاج تانى، ده لو زرت مدونتى تانى اساساً.
|
صديقتى العزيزه
انتى انسانه جميله ولااعنى بذلك جمال الشكل فنحن لم نتقابل
اقصد ان كلماتك واسلوبك وشكل مدونتك وذوقك الغنائى . كل ذلك يدل على مدى رقتك
لم اتعجب حينما قرأت البوست الاخير ولست اعنى التقليل من مشكلة الادمان ولكن اعنى ان اى انسان يمكن ان يمر بهذه التجربه ولكن الاقوياء فقط هم الذين يستطيعون النجاة منها .
كلنا يمر بفترات سيئه وتجارب قاسيه او مهينه ولكن من يستطيع ان يعود من تجربته كما انت عليه الان فانه يستحق منى كل الاحترام ----والحب ان امكن
صديقتى الرقيقه مشمشه انت انسانه قريبه الى نفسى من خلال مدونتك فارجو ان تستمرى فى التدوين ولا تحرمينى من الدخول الى عالمك الذى اشتاق اليه يوميا
صغيرتى الجميله والرقيقه اعتنى بنفسك وضمدى جراحك وفى يوم ما ستتذكرين تجربتك وتقولين الحمد لله الذى عافانا مما اصابنا
اتمنى ان تخرجين قريبا من البئر وحينها ستجدين الكثير من الضوء
مهما حدث فلا تيأسى من العوده الى من يحبونك
و
انا
منهم
-
-
صديقك هشام او سنوهى