آآآآآآآآآه صرخة ألم .. صرخة فرح.. صرخة استغاثة.. صرخة موت.. صرخة ميلاد..
لم يدرك حينما سمعها معنى تلك الصرخة، فقط سمع صوتها الخافت مدوياً عندما مر – صدفةً - بجوار أذنية سابحاً فى الهواء على ذرة صغيرة وحيدة. التفت اليها وشعر بصدق مسامعه، كان على يقين بوجودها، احترم كيانها وصدقها، ولذا حارب فى الدفاع عنها، كان على استعداد لبذل كل المجهودات كى ينقذها .. يسكن صرخاتها.. يهدىء من روعها ....يطمأنها... يحتويها .. ويضيىء حياتها
كان يا ما كان.... هورتون فيل كبير، طيب اوى وجميل، كان بيعوم فى المية، وبيسبح ف النيل، وف يوم م الايام، وهو فى انسجام، و بيلعب ف المية، سمع صرخة قوية، مرت جنب ودنه، سرقت عقله منه، اصلها صرخة نونة، من ذرة صغنونة، قلبه رق ليها، قام دور عليها، فضل ماشى وراها، متعاطف وياها، ف الاخر لقاها وعلى ورده احتواها
بالجنون اتهموه، اعداءه و شتموه، آل ايه بيكلم وردة، عينه عليهم باردة اصل الذرة جواها .. عالم من ناس عايشين، سعداء متهنيين، ودايما مبسوطين، بس مكنوش عارفين، انهم ف الهوا طايرين، ولحسن حظهم، هورتون كان جنبهم، واتحمل عشانهم كتير م الكنغر الشرير، اللى مكنش مصدق كل كلام الفيل.
هورتون كلم الذرة ووعدهم بالحماية، وانه هيصمد عشانهم لغاية النهاية، وعشانهم عام فى بحور .. طار فى الجو .. وعدى جسور، لأجل ما يوصل بيهم لقمة جبل نول ، عدى الكوبرى ما بين جبلين، شاف الموت بعنيه الاتنين، حارب الخفاش أبو جناحين، دور ع الوردة ف ملايين، ولقاها طبعا .. ماهو كله يقين، بس التهمة ثابته عليه، وانه جنانه هيقضى عليه، قام الكنغر حكم عليه، بالحبس واعدام للوردة، هدف الفيل انقاذ الذرة، وهدف سكانها كده برضه، أمنيتهم يحموا الفيل، بالنسبة لهم ده رد جميل، صرخوا عشانه بكل طاقتهم، عشان يثبتوا للكل وجودهم، وان الفيل مش مجنون، ده حد طيب اوى وحنون، وفعلا علوا صوتهم لحد ما سمعوهم، ووجودهم وكيانهم للكل اثبتوهم، والعالم السعيد قالك ده اليوم ده عيد، بالوحدة والترابط والصبر والعمل، مزيكة بشوق وفرحة بالحب والامل، والطبل والاغانى بقى ليهم معنى تانى، ف العزف سيمفونية بتغنى للبشرية، مش شرط عنيك تشوفنى علشان اكون موجود، مش شرط تقيسنى بحجمى، قدراتى مالهاش حدود، مش شرط اكون صغير، مش يمكن انت اللى كبير، ويكون العالم عندك ذرة ف عالم الغير؟؟
وتوتة توتة خلصت الحدوتة بذمتكو حلوة والا ملتوتة؟؟
Horton hears a who فيلم جميل، انصحكوا تتفرجوا عليه |
سمع صوتها وحس بيها
صدق احساسه واتمسك بيها
بس يا ترى هى حست بيه؟