زيارة قصيرة الى مستشفى الشيخ زايد
خرجنا امبارح انا ومجموعة من الأصدقاء .. الجمعة 23/1/2009
وروحنا زرنا اصدقائنا الجرحى فى مستشفى الشيخ زايد
فيهم اطفال يقطعوا القلب
محتاجين لكم جدا جدا جدا جدا
فيهم طفل اسمه محمود عمل مشهد غريب جدا
اول ما سمع صوتنا
قال سلموا عليا يا اصحابى
ولما حد من اصدقائنا سلم عليه مسك ايده ومكنش عايز يسيبه وباس ايده وحطها على قلبه وقاله خليك معايا
الطفل ده اصابته خطيرة جدا
الطفل ده فقد بصره من شظايا صاروخ
الطفل ده ميعرفش اصابته ايه
وباباه مخبى عنه لغاية دلوقتى
بس طفل .. مجرد طفل .. محتاج كلمة حلوة .. محتاج حد يطبطب عليه .. محتاج يحس انه ليه حد بيحبه وبيسأل عليه .. محتاج لكو اوى .. والله محتاج لكو اوى .. متتأخروش عليه ..
كمان كان فى طفل تانى زى القمر ودمه خفيف اصابته فى دراعه والابتسامه على وشة وبيضحك ويهزر ، ربنا يهون عليه ويخفف عنه يارب .. ادعوله
وفى طفل تانى فاقد بصره ومش بيقول غير الحمد لله
وفى بنوتة اصابتها فى دماغها وألمها لا يحتمل .. احنا مش بنستحمل شوية صداع ، فما بالكم بشظايا صاروخ فى دماغ طفلة
وفى بنت صغنونة عندها سنتين ونص فى منتهى الجمال وسريرها متحوط باللعب والدباديب، البنت دى مش بتتكلم، وعندها حالة فزع، ولما حد يقرب منها بتصرخ ...البنوتة دى عندها اصابة فى بطنها وبرضه محتاجة تشوف ناس كتير حلوين وطيبين عشان تخرج من حالة الخوف دى
وفى اصابات تانية.. هما حوالى 28 حاله .. .بس الملايكة الصغيرين اللى زى القمر حالتهم تأثر فى الحجر .. حسبنا الله ونعم الوكيل
معرض الكتاب شغال
وفى اكتر من حالة لاطفال فقدوا بصرهم
ممكن نجيب قصص من المعرض ونروح نقعد معاهم ونحكيهالهم ونهزر ونلعب ونخفف عنهم شوية
ممكن نجيب لهم عصير او بسكويت او فاكهة تقويهم - من اطعم اخاه حلوى اطعمه الله من حلوى الجنة
ممكن نجيب لهم لبس او بطانية تدفيهم
ممكن نحط فلوس فى ظرف وهما يجيبوا بيها الدوا اللى محتاجينه
وممكن أوى نروح بس نزورهم ونرسم ابتسامة على شفايفهم
وتذكروا :::
عن أبي عبد الله (عليه السلام) قال : من أدخل على مؤمن سروراً خلق الله من ذلك السرور خلقاً، فيلقاه عند موته فيقول له : أبشر يا ولي الله بكرامة من الله ورضوان!.. ثم لا يزال معه حتى يدخله قبره فيقول له مثل ذلك، فإذا بعث تلقاه فيقول له مثل ذلك، ثم لا يزال معه عند كل هول يبشره ويقول له مثل ذلك، فيقول له : من أنت يرحمك الله؟.. فيقول : أنا السرور الذي أدخلته على فلان
ربنا يبارك لكم ويجعله فى ميزان حسناتكم يارب |
بجد كان نفسى اكون معاكم .. لكن كنت فى معرض الكتاب فى الوقت ده
عموما متعوضه طول ما فى جرحى فلسطينيين على ارض مصر
ربنا يوفقكم ويكتبلكم عن كل خطوه حسنه
تحياتى