بما انى عاهدت نفسى ابتدى صفحة جديدة واعتبر نفسى لسة مولودة اول امبارح .. يعنى انا دلوقتى عمرى يومين، ولان التنمية البشرية بتقول شرط تحقيق السعادة انك تعيش اللحظة ( ليفينج ذا مومنت) ، ولأنى عجبنى اسلوب سرد بعض المدونين والمدونات لمواقف وتفاصيل حياتية بيعيشوها بيعملوا ده بطريقة طبيعية وتلقائية وقد تكون بدون متابعة وحضور كورسات ابراهيم الفقى المكلفة جدا، فانا هاحكى لكو عن اول محاولاتى الخروج من شرنقة الكسل والزهق.
أولا لانى مش من النوع اللى مش بيعرف ياكل لوحده، وعشان كده عايشة بقالى اسبوع على ساندتشات البانية والتونة والأسبوع اللى قبله عى السمك الجاهز . ولأنى مش بدخل المطبخ كتير .. فالنهاردة يوم تاريخى فى حياة مشمشة ..
نفسى هفتنى على طبييييييييخ.....
شغلت منير وعليته اوى .......
- جاى من بلادى البعيدة لا زاد ولا مية وغربتى صاحبتى بتحوم حواليا وانتى تجوليلى بحبك، تحبى ايه فيا .. وده حب ايه ده اللى من غير اى حرية ........ يوووونس فى بلاد الشوق، اه يا ولد الهلالية ، بتونسنى دموع العين وانا سايب اهاليا، اه يا ولد الهلالية ، لا عليا ولا بيا، يا عزيزة يا بنت السلطان، لو يتغير الزمان، وجابلتينى فى اى مكان، كنت اعشق من غير ما تقولى، يوووونس، أنا يونس -
فتحت الفريز .. اختارت نوع الخضار اللى بحبة ألا وهو (البسلة) ، دخلت المطبخ .... سلقت الفراخ .... عملت البسلة ..... عملت الرز......... واو مش قادرة اصدق
مشمشة شطوووووووووووووووووووووووووووووورة ... المواهب دى كانت مدفونة فين ، الاكل يجنن .. تسلم ايديكى يا مشمشة ... بقولها لنفسى دلع مش غرور، وعموما الله يسلمكوا عشان انتو اكيد بتقولوهالى دلوقتى.. دلع برضه
هقوم اكل بأة ... اتفضل يا يونس كل معايا .. مشمشة عندها النهاردة احل زاد ومية |
اول تعليق
اشوف البوست وارجع تانى اعلق