.jpg)
الراجل ده اول ما عينك تيجى عليه توصفه باقرب وصف ليه وهو إنه ... راجل طيب
الراجل الطيب ده .. راجل بسيط.. يعنى على اد حاله ، وربما يكون حاله واسع عليه حبتين، بيشتغل على باب الله شغلانة وبسيطة اوى، بيشتغل ولا مؤاخذة رغم انى مبحبش الكلمة دى ولا اعرف يعنى ايه مؤاخذة، ملمع أحذية
قاعد ع الرصيف ف عز الحر ادام جنينة سراى القبة وفارش عدة الشغل ادامه
ملامح وشه هادية، يمكن تكون مش واضحة اوى اصلى لقطت الصورة بسرعة جدا وانا ماشية بس ثقوا فيا او روحو شوفوه
تركيبته بتجمع بين متناقضات غريبة، قاعدته ع الرصيف فيها كبرياء وتواضع، ملامح وشه فيها رضا وغضب،
كله ثقة وقناعه.. وف نفس الوقت يصعب عليك،..
الراجل الطيب ده معندوش وظيفة مرموقة ولا مكتب فخم ومكيف ولا ورد بيجيله كل اسبوعين من مزرعة الوزيرالراجل الطيب ده ممكن اوى يكون وحيد وملهوش حد، وممكن يكون اتظلم ف حياته ومن اقرب الناس ليه الراجل الطيب ده مش غارقان ف الماضى بدليل انه عايش الحاضر ومستمتع بيه *****...
الراجل الطيب ده ربما يكون معندوش اللى يتعشا بيه وكل ما يملكه ما يجيش تمن ولا مؤاخذة "الكلمة اللى مبحبهاش" ثمن حذاء من اللى بيلمعهم .
الراجل الطيب ده رغم ظروفه القاسية، لا منهار ولا بيفكر ف الانتحار
الراجل الطيب ده ممدش ايه ف جيب حد ولا ماسك مطوة ولا بينعى حظه والظروف والزمن ويبرر بيها اى جريمة يقدر يرتكبها
الراجل الطيب ده ممدش ايده كشحات عشان ياكل
الراجل الطيب ده محترفش مهنة او صنعة فيها فبركة وفهلوة ونصب وضحك ع الدقون الراجل الطيب ده معندوش رغبة ف الانتقام من قهر الزمن وظلم المجتمع *****
الراجل الطيب ده ماسك الجورنال ... وبيقرا
بيقرا بنهم وشغف ولا اجدع مثقف .. واكل الجورنال .. اللى ممكن يكون شاريه او مستلفة من بتاع الجرايد اللى قاعد جنبه
الراجل الطيب مضيعش وقته ف افكار سلبيه ممكن تهده وتستنفذ طاقته
الراجل الطيب ده رضاه جاى من ثقافته ووعيه وادراكه - رغم ان مظهره ميبانش عليه - لكن ملامح وشه بتقول كده
الراجل الطيب ده عنده ثقة ف نفسه وامل ف ربنا وقناعه ف افكاره وطموح شريف
الراجل الطيب ده رغم بساطته القراية هوايته وعارف ان فيها افادته
الراجل الطيب ده عنده اللى مش عند كتير فينا
الراجل الطيب ده علمنى درس مهم جدا وليه فضل عليا والاكتر من كل ده ... حبيته وبفكر احب القراية... لو نفسك تعرف سر قناعات الراجل ده ايه... إقرا وانت تعرف..
وعلى فكرة الراجل ده بيقرا الدستوووووووووووووووووووووووووووووووووووور
|
.jpg)
انا اول تعليق
الحمد لله
تعرفى ان عندك حق
فعلا الراجل ده متميز ومحترم
اولا لانه يعمل عمل شريف
ثانيا لانه مثقف ويقرأ جريدة الدستور مثل العبد لله اللى هو انا
ثالثا يمكن يكون بيخل على مدونتك ويقرأ ولكن لايستطيع كتابة تعليق بسبب مشاكل تقنيه
ممكن ؟